Ministri në detyrë i Mbrojtjes, Ejup Maqedonci, ka vlerësuar lartë mbështetjen dhe partneritetin e vazhdueshëm të Mbretërisë së Bashkuar në procesin e shtetndërtimit të Kosovës. Ai ka zhvilluar një takim me këshilltarin bilateral britanik, nënkolonelin Mike Butler, ku është diskutuar për bashkëpunimin aktual dhe mundësitë për zgjerimin e tij.

“Mbretëria e Bashkuar në secilën etapë të shtetndërtimit të Republikës së Kosovës ka qenë partner i rëndësishëm dhe tejet mbështetës në ngritjen e kapaciteteve humane, logjistike e ligjore të secilit sektor, veçanërisht ky shtet ka dhënë kontribut jashtëzakonisht të vyer në fushën e sigurisë dhe mbrojtjes. Pikërisht në këtë sektor është duke ofruar mbështetje këshilltari bilateral, nënkolonel Mike Butler”, ka shkruar Maqedonci në Facebook.

Ai e ka vlerësuar takimin me nënkolonelin Butler si produktiv. ”Diskutuam rreth aktiviteteve të cilat janë duke u zhvilluar bazuar në planin bilateral ndërmjet shteteve, operacionin Interflex që përbën misionin më të rëndësishëm aktual të FSK -së jashtë vendit, e po ashtu duke njohur potencialin e ushtrisë sonë temë diskutimi ishte dhe zgjerimi i bashkëpunimit në drejtime të reja, ashtu që ushtria jonë si Forcë profesionale t’i kontribuoj paqes përtej kufijve tanë shtetëror”, ka shtuar Maqedonci.